Hamza: PDK e dërgon seancën konstituive në Kushtetuese

Kryetari i PDK-së, Bedri Hamza, ka njoftuar se partia e tij nuk do të marrë më pjesë në punimet e Kuvendit, pasi deputetët e LVV-së abstenuan në votimin e Vlora Çitakut për nënkryetare.

Hamza tha se PDK-ja kishte ardhur në seancë me synimin që Kuvendi të konstituohej dhe vendi të kishte institucione, por akuzoi LVV-në dhe Albin Kurtin se po vazhdojnë bllokadën.

“Partia shumicë, LVV-ja, Albin Kurti, nuk e ka ndërmend vendit me i dhënë institucione. Vazhdon me veprimet e tyre të papërgjegjshme, joinstitucionale, joshtetërore, jo në dobi të qytetarëve të Kosovës, me prodhu drama, me prodhu kriza, me shpik situata të panjohura me qëllim që të vazhdojë me bllokadën”, deklaroi Hamza.

“Prej sot, PDK nuk ka asnjë arsye me marrë pjesë në punimet e Kuvendit të Kosovës dhe ne do ta referojmë, do ta dërgojmë lëndën në Gjykatën Kushtetuese. Jemi të sigurt që afatet kushtetuese kanë përfunduar më 7 gusht”, tha ai.

“Ne e votuam të propozuarin nga radhët e LVV-së, ndërsa ata nuk e votuan kandidaten nga PDK-ja dhe në këtë mënyrë e pamundësuan konstituimin e Kuvendit”, përfundoi Hamza.

Lushaku-Sadriu: LVV-ja e pamundësoi votimin në pako të nënkryetarëve

Deputetja e Lidhjes Demokratike, Jehona Lushaku Sadriu, tha se LVV-ja e pamundësojë votimin në pako, sepse nuk i përkrahi kandidatët e partive të tjera për nënkryetar të Kuvendit të Kosovës.

“Nuk ishte vendim i yni, ishte mospajtim i deputetëve të LVV-së”.

Haxhiu ndërpret seancën pasi PDK-ja lëshon sallën

Kryetarja e Kuvendit të Kosovës, Albulena Haxhiu, ka ndërprerë vazhdimin e seancës konstituive të Kuvendit të Kosovës.

Kjo për shkak se Partia Demokratike e Kosovës e lëshoi sallën. Paraprakisht kandidatja e tyre për nënkryetar të Kuvendit të Kosovës, Vlora Çitaku, nuk i mori votat e nevojshme për t’u zgjedhur në këtë post.

Deputetët e Lëvizjes Vetëvendosje, abstenuan në votimin për Çitakun.

Haxhiu bëri të ditur se vazhdimi i seancës do të njoftohet me kohë.

Dështon zgjedhja e Çitakut si nënkryetare e Kuvendit, LVV-ja abstenon, PDK-ja lëshon sallën

Vlora Çitaku nuk është zgjedhur nënkryetare e Kuvendit të Kosovës nga radhët e Partisë Demokratike të Kosovës.

Deputetët e Lëvizjes Vetëvendosje kanë abstenuar në votim.

PDK dhe LDK kanë votuar pro emrit të Vlora Çitakut për nënkryetare të Kuvendit të Kosovës.

Pas këtij zhvillimi PDK-ja e ka lëshuar sallën e Kuvendit të Kosovës.